ఫుట్ బాల్ ప్రపంచ విజేతగా అర్జెంటీనా నిలవడంతో, ఆ దేశంలో సంబరాలు అంబరాన్నంటాయి. మూడు దశాబ్దాల సుదీర్ఘ నిరీక్షణకు తెరదించుతూ అర్జెంటీనా.. ఫిఫా ప్రపంచకప్‌ కైవసం చేసుకుంది. ఆదివారం జరిగిన సాకర్‌ తుది సమరంలో అర్జెంటీనా షూటౌట్‌లో డిఫెండింగ్‌ చాంపియన్‌ ఫ్రాన్స్‌ను మట్టికరిపించింది. చివరి వరల్డ్‌కప్‌ ఆడుతున్న దిగ్గజం మెస్సీకి ఘనమైన వీడ్కోలు ఇచ్చింది. అర్జెంటీనా అద్వితీయ ప్రదర్శనతో అదరగొట్టింది. కిలియన్‌ ఎంబప్పే హ్యాట్రిక్‌ గోల్స్‌తో పోరాడినా.. ఫ్రాన్స్‌ను షూటౌట్‌ చేసిన లియోనెల్‌ మెస్సీ సేన.. విశ్వవిజేత కిరీటాన్ని సొంతం చేసుకొంది.ఆదివారం జరిగిన మెగా ఫైనల్లో అర్జెంటీనా 3-3 (4-2)తో ఫ్రాన్స్‌ను ఓడించి మూడోసారి ప్రపంచక్‌పను సొంతం చేసుకొంది. అర్జెంటీనా తరఫున మెస్సీ (23, 108వ), డిమారియా (36వ) గోల్స్‌ చేయగా.. ఫ్రాన్స్‌ తరఫున ఎంబప్పే (80, 81, 118వ) మూడు గోల్స్‌తో అదరగొట్టాడు. ఇక, షూటౌట్‌లో అర్జెంటీనా 4 స్కోరు చేయగా.. ఫ్రెంచ్‌ టీమ్‌ 2 కిక్‌లను మాత్రమే గోల్‌లోకి పంపగలిగింది. ఫిఫా చరిత్రలోనే అత్యంత ఖరీదైన ప్రపంచకప్‌గా చరిత్రకెక్కిన ఖతార్‌ మెగాటోర్నీ ఏర్పాట్లలోనూ భళా అనిపించుకుంది. దోహాలోని లుసైల్‌ స్టేడియంలో కండ్లు మిరుమిట్లు గొలిపే బాణాసంచా మెరుపులతో కాంతులీనింది. స్పానిష్‌ మాజీ ఆటగాడు కాసిల్లస్‌తో కలిసి బాలీవుడ్‌ హీరోయిన్‌ దీపిక పదుకోన్‌ ప్రపంచకప్‌ ట్రోఫీని మైదానంలోకి తీసుకొచ్చింది.ఈసారి ప్రపంచ కప్‌లో మొత్తం 32 జట్లు తలపడినా..ప్రధానంగా రెండు టీమ్‌లు అర్జెంటీనా, పోర్చుగల్‌ వాటిల్లో లియోనెల్‌ మెస్సీ, క్రిస్టియానో రొనాల్డోపైనే సాకర్‌ ఫ్యాన్స్‌ దృష్టి నిలిచింది. కారణం ఈ తరం ఫుట్‌బాల్‌ క్రీడలో ఈ ఇద్దరు తిరుగులేని స్టార్లు కావడమే. ఇంకా..35 ఏళ్ల మెస్సీ, 37 సంవత్సరాల రొనాల్డోకు ఇదే చివరి మెగా టోర్నమెంట్‌ కావడం. 56 ఏండ్ల తర్వాత ఫిఫా ప్రపంచకప్‌లో హ్యాట్రిక్‌ నమోదు చేసిన ఆటగాడిగా ఎంబాపే చరిత్రకెక్కాడు. అర్జెంటీనాకు ఇది మూడో ప్రపంచకప్‌ టైటిల్‌. గతంలో 1978, 1986లో కప్పు కొట్టింది.